Periods ke dauraan menstrual hygiene maintain karna bahut zaroori hai. Yeh sirf comfort ke liye nahi balki infections, badbu ya durgandh aur skin irritation se bachne ke liye bhi zaroori hai. Sanitary pads, tampons, menstrual cups, period underwear — saare products safe hote hai, bas unhe sahi tarike se aur time-time par change karna zaroori hota hai.
Sanitary pads ko har 4–6 ghante me badalna chahiye, chahe flow light ho ya heavy. Zyada der tak ek hi pad lagakar rakhne se moisture jam jaata hai, jisse bacteria/fungus badh sakte hain.
Tampons ko 4–8 ghante me change karna zaroori hai. Ek hi tampon ko poori raat pehenkar na rakhein kyunki isse Toxic Shock Syndrome (TSS) ka rare risk hota hai.
Menstrual cups reusable hota hai, isko kai baar use kar sakte hai aur ye zyada blood collect kar sakta hai, per Menstrual cup ko clean aur sanitize karna bahut zaroori hota hai. Har baar use karne ke baad dhona chahiye aur period khatam hone ke baad boil karke sanitize karna chaahiye.
Periods ke dauraan hygiene kaise maintain kare-
- Humesha hands wash karein use karne ke pahle aur baad me (before & after changing products)
- Genital area ko sirf water se clean rakhein (vagina self-cleaning organ hai)
- Cotton underwear hi pehene
- Scented wipes (Khushboo wale wipes), sprays, ya scented pads avoid karein
- Period products flush na karein humesha wrap karke bin me daale.
Periods me Jo bhi product use kar rhe hai usko time time pe change karna, aur product ko check karte rahna chahiye. Cotton aur breathable (Halka ya jaalidaar) underwear pehenna aur Periods time pe body me ho rhe changes observe (Dhyaan) karna, yeh sab menstrual health ke important steps hain.
Agar smell, unusual discharge, severe pain (Bahut teez dard), ya heavy bleeding ho, to doctor se consult kare.
